主场专打大老虎　巴塞博反弹赢畀你「体」

2024-12-23　来源: 八一体育点击

西甲榜首大战，巴塞隆拿硬撼马德里体育会。马体会上场联赛赢波後，喺踢少1场之下追到同巴塞同分，而且各项赛事11连胜，表面上好值得追捧，不过佢哋对亲巴塞都冇好结果，近5次交手全部输晒，格食格味浓，「地上最强」专打大老虎，今场主场出击必痛击对手，全取3分以西甲榜首过新年，强捧主胜。（Now 632周日凌晨4时直播）

马体会上仗主场1比0小胜基达菲，各项赛事11连胜，无可否认状态同士气都会好好，不过要留意番，当中除咗击败巴黎圣日耳门及西维尔之外，其余喺联赛嘅对手，好似基达菲、华历简奴、艾拉维斯及拉斯彭马斯等球队，实力只系一般，呢个11连胜「含金量」唔算高。

最大问题系，马体会「恐巴症」非常严重，近5次对巴塞隆拿输晒之余，仲要半场已经落後，而且近4次全部入唔到波，再数远啲，由2006年开始马体会作客巴塞从未赢过，呢个魔咒都几难破。

巴塞隆拿喺西甲接连失分，今场对住强敌，系赢波反弹好时机，佢哋18场联赛入50球，攻力冠绝西甲，虽然拉明耶马受伤缺阵，但球队仍然有罗拔利云度夫斯基及拉芬夏比洛尼，而且有柏迪同丹尼尔奥莫等支援，整体实力仍然高强。巴塞踢硬仗向来特别醒神，除咗食住马体会，今季作客亦曾经大炒皇家马德里4比0，今场必然会全力抢3分，主胜值得支持。