周四(29日)凌晨法甲，巴黎圣日耳门(PSG)喺联赛重开第1击赢得惊险，巴西前锋尼马因为插水被逐离场，全靠基利安麦巴比喺补时6分钟贡献绝杀，PSG主场得以2比1力克斯特拉斯堡，继续巩固榜首位置。

阿根廷前锋美斯捧世盃後仍然休息，2位喺世盃失意嘅巨星基利安麦巴比同尼马就正选挂帅，14分钟尼马开罚球由马昆贺斯顶入，但呢位巴西中坚51分钟摆乌龙帮客队追平。尼马之後更成为罪人，佢61分钟开肘打中对手食黄牌，1分钟後再喺禁区插水博12码，闪电拎第2张黄牌被逐。PSG踢少个仍然狂攻，补时阶段基利安麦巴比博到12码，佢亲自操刀喺96分钟攻入绝杀，带领PSG赢2比1完场。

基利安麦巴比赛後表示：「世盃决赛嘅伤永远唔系好番，但法国队嘅失望唔应该由PSG付出代价，呢个系2个唔同嘅环境，我仍然决心为PSG赢取所有锦标。」基利安麦巴比喺2022年攻入32球，成为1958年嘅传奇射手方亭(35球)後，法甲年度最多入波球员。