周一(13日)凌晨苏足盃第5圈赛事，格拉斯哥流浪主场3比2击败苏冠球队巴特里，不过比赛期间出现争议事件，格流前锋马历添文喺对手归还球权之际，突然抢波偷袭得手，冇品行为引发巴特里球员激烈抗议，最终格流主帅比亚尼下令球员唔防守，送番1个入波畀对手「还债」。

事件发生喺比赛70分钟，当时两队踢成1比1平手，巴特里球员喺一次争抢入面受伤倒地，格流球员就踢波出界畀军医入场治疗，当比赛重开，巴特里球员按惯例踢返个波畀对手，但马历添文就另有所图，佢一个箭步抢走对方未踢出嘅波，直捣黄龙杀入禁区射入，巴特里球员嬲到将佢倒跌，引发双方球员推撞。

混乱期间，格流领队比亚尼就下令球员，中圈开波後停止防守送番1球畀巴特里，客队就由迪方尼中圈带到龙门口射成2比2，双方领队亦握手示好，格流最终喺86分钟绝杀赢3比2晋级。比亚尼赛後维护马历添文：「佢当时受咗伤，唔知到个波系我哋踢出界，所以佢完全唔知当时情况，只系照常咁去逼抢，我哋做番应该做嘅事，马历添文并唔系骗子。」