车路士班主阿布拉莫域发声明证实卖盘後，盛传有至少3名买家准备出手，除瑞士富商韦斯率先表态有意接手车路士外，英国《太阳报》指英、美超级富商都对「蓝战士」虎视眈眈，据报英国富豪Jim Ratcliffe同韦斯同美国拍档组成嘅财团最大机会。

86岁瑞士富商韦斯周三(3日)率先踢爆阿布拉莫域主动搵佢兜售车路士，呢位做医疗设备生意嘅富豪住喺美国，而佢嘅生意拍档就系MLB名牌洛杉矶道奇班主之一嘅Todd Boehly，两人嘅身家报称都系40亿镑左右，佢哋联手自然威力倍增。韦斯日前亦表明如果收购车路士，一定会搵人合作，相信韦斯同Todd Boehly联手机会好大。

另一热门系英国最有钱嘅Jim Ratcliffe，69岁嘅佢总身家约60亿镑，除咗有钱之外，佢仲系车路士嘅超级球迷，据报系「蓝战士」嘅季票持有者，而且Jim Ratcliffe对足球产业亦有一定认识，2017年已经收购瑞士超球会洛桑，同时亦系法甲球会尼斯班主。

至於较冷门嘅人选有美国81岁富商Stephen Ross，佢系系NFL球队迈阿密海豚班主，但亦系传闻买家中最具争议人选，佢系之前搞到球坛风雨飘摇嘅欧超联搞手之一，形象分已经输晒。