曼联球星C朗被指事前知道冇得喺「曼市打吡」踢正选後，发脾气飞返葡萄牙，甚至传出佢同球会关系破裂，好可能今夏离队，英国《太阳报》爆料指曼联会方开始物色新射手，顶替C朗，头号目标系爱华顿前锋李察利臣。

据悉曼联转会事务主管麦迪祖治已经联络李察利臣嘅经理人华拉斯高，商讨今夏签入呢位24岁巴西国脚嘅可能性，对方反应正面，因为李察利臣现时年薪唔够500万镑，而且爱华顿方面仲要求佢减人工，令呢位前锋有所不满，如果佢选择成「魔」，薪酬有望增加一倍。

爱华顿深受降班威胁，英国《每日邮报》指「拖肥糖」一旦下季降落英冠，财政收入将会大减，无力负担现时球员薪酬支出，到时一系出售高薪球员，一系要求佢哋减人工。

因此，李察利臣应该有兴趣转投曼联，爱华顿现时将佢定价为6,500万镑，但如果球队降班，会方可能被逼减价卖人。

身穿爱华顿7号球衣嘅李察利臣有份协助巴西捧2019年美洲国家盃冠军及上年奥运男足金牌，佢2018年由屈福特加盟爱华顿以来，上阵139场入47球，虽然入波数字唔多，但胜在勤力跑动，可以胜任前锋同翼锋，啱晒曼联看守领队兰历克嘅逼抢战术。