德国球星奥斯尔日前被土耳其球会费伦巴治踢出大军名单，再一次同球会「反面」收场，佢嘅前阿仙奴队友蒙利尔日前接受访问，指出奥斯尔最大问题系「同个个人都唔妥」，更踢爆佢喺云格时代最後阶段亦系不欢而散。

奥斯尔上年初由阿仙奴转会费伦巴治，话返「家乡」土耳其踢波系梦想成真，但佢喺新球会未受重用，日前更被踢出球会大军名单，有传佢系同教练不和，曾经同奥斯尔喺阿仙奴做队友，依家效力皇家苏斯达嘅蒙利尔就话：「奥斯尔嘅问题，系佢同每个人都有问题。佢同云格都系反面收场，最後几场波都冇份踢，之後艾美利想搵返佢做领袖，但之後就发现佢嘅状态完全唔及其他人。」

事实上，奥斯尔由出道至今，效力每支球队都系肉酸分手。喺史浩克04同云达不来梅嗰阵，因为人工问题同要求转会皇马，分别同球会闹翻；喺皇马最後又因为续约问题反目，转投阿仙奴後被皇马会长皮里兹大闹，指奥斯尔爸爸贪得无厌；效力阿仙奴尾段因拒绝跟大队减薪同状态差被雪藏；喺德国国家队18年世盃出局後，更发声明指责被德国足总及德国人歧视佢系移民後代，加上同土耳其独裁总统埃尔多安密切关系而成德国公敌，依家连费伦巴治都将佢踢走，唔知仲有边个球会「够胆」接收奥斯尔。