因伤缺阵3个月嘅巴塞隆拿攻击手安素法迪，近日已经重投球队训练，呢位巴塞10号仔，有望喺下场对切尔达嘅西甲赛事中，重返赛场。

作为巴塞重点培养嘅超新星，安素法迪近年长期受伤患困扰，今年1月西盃面对毕尔包一战，佢再度伤出，为咗可以尽快重返赛场，佢决定唔听球会医疗团队嘅建议做手术，而系采取保守治疗。上月底呢位19岁小将，已经重返训练场，并慢慢重投球队操练，相信距离复出嘅日子已经唔远。

安素法迪2019/20赛季横空出世，当时只有17嘅佢，喺西甲斩获7球兼贡献1次助攻，美斯离队之後，佢亦成功接过传奇嘅10号战衣，足见巴塞对呢位明日之星嘅重视，惟伤病情况阻碍咗佢嘅发展，今季安素法迪喺西甲上阵5次，暂时攻入3球兼交出1次助攻。