曼联周三(20日)凌晨作客利物浦嘅「双红会」前，中场般奴费南迪斯发生恐怖车祸，佢揸车去练习途中同另一部车迎头相撞，呢位葡萄牙国脚部「波子」右边车头严重损毁，好在般奴费南迪斯喺意外中并冇受伤，照常练习备战对利物浦大战。

交通意外发生喺周二(19日)，当时般奴费南迪斯去紧卡宁顿训练基地，画面所见涉事两部车都停喺狭窄路中心，般奴费南迪斯就喺车外查探佢部价值9.4万镑保时捷嘅损毁情况，而且一脸无奈。般奴费南迪斯之後亦如常去练习，离开嗰阵就要「黐车」由桑马达载走。

曼联领队兰历克表示，般奴费南迪斯并无受伤：「意外发生喺般奴费南迪斯嚟练习途中，以我所知冇人受伤，佢亦有跟队操练，般奴费南迪斯依家OK，对利物浦场联赛都OK。」般奴费南迪斯早前同曼联续约5年，周薪增加至24万镑。