曼联今夏动用5,500万镑收购阿根廷中坚利辛度马天尼斯，系坦哈格上任後最大收购，不过呢位贵价新援竟然成为球队「毒瘤」，白礼顿同宾福特将帅齐齐爆料，话战术上系睇住呢位身高1米75「矮仔中坚」嚟打，对宾福特一仗坦哈格都知出事，踢完上半场，就将利辛度马天尼斯换走。

曼联开锣战1比2输畀白礼顿，白礼顿中场拉尔拉拿赛後爆料，话其中一项战术系主打利辛度马天尼斯嘅位置，今场宾福特亦照办煮碗，领队法兰基赛後表示：「我哋知道喺佢(马天尼斯)身上，有机会争赢或抢赢第二点，我哋当然参考过白礼顿嘅战术，正常嚟讲佢哋系後场组织，但对住曼联就不断放长波，呢样都系我哋擅长嘅踢法。」

坦哈格原本希望利辛度马天尼斯嘅脚法同传球能力，可以帮助球队由後场开始组织推进，但佢只得1米75嘅身高就被打爆，今场输第3球就系佢眼光光睇住宾美顶入，结果完半场就被华拉尼入替。

利辛度马天尼斯其实可以胜任防中或者左闸，坦哈格可以考虑摆佢去其他位置，但踢中坚就危危乎。