周日(13日)凌晨德甲，拜仁慕尼黑作客以2比0击败史浩克04，19岁天才新星穆斯亚拿第100次为拜仁上阵，成为球队史上首位U19百战球员，并贡献2次助攻。

呢位进攻中场今季各项赛事上阵22场，已经射入12球及10次助攻，获德国名宿马图斯大赞佢似美斯，可以喺今届世界盃大放光芒。

穆斯亚拿今场送出2次妙传，先系38分钟後脚弹畀基拿比射入，跟住下半场初段，佢盘球突破後，横传畀祖普莫亭射成2比0。祖普莫亭近9场比赛有8场取得入球，今季已经有11球进帐及3次助攻，拜仁各项赛事获得10连胜。

虽然穆斯亚拿今场冇波入，但作出2次助攻之後，令佢今季入波及助攻达到「双双」，对於1位19岁球员而言，实在非常难得，赛後马图斯大赞呢位德国国脚：「穆斯亚拿同美斯非常相似，表现就好似荷里活电影一样，拜仁绝对唔可以放走佢，佢值2.5亿欧元。」穆斯亚拿有份入选德国出战今届世界盃大军名单，成为球队争冠重要本钱。

至於今场入1球嘅另一位德国国脚基拿比亦取得「双双」，今季各项赛事上阵23场，射入10球及10次助攻，德国队有呢2位猛将助阵，今届世界盃好有睇头。