周日(13日)法甲赛事，巴黎圣日耳门(PSG)主场5比0大胜欧塞尔，法国前锋基利安麦巴比喺出战世界盃前有入波振声威，不过佢今场亦有争议事件，半场返更衣室途中，被影到用手揸住下体摆动，疑似向对手作出挑衅。

PSG今场赢得轻松，基利安麦巴比11分钟先开纪录，下半场再有卡路士苏拿、阿舒拉夫、连拿度辛捷士同伊基迪基入波，最终大胜5比0。基利安麦巴比今场攻入佢喺PSG第190球，距离球会史上首席射手卡云尼(200球)只差10球，「登基」指日可待。

基利安麦巴比今场亦有争议，半场返更衣室期间，佢突然对住身边嘅欧塞尔後备球员里安，做出揸住下体摆动嘅不雅动作，之後就施施然咁加快脚步走开，里安望见就表现一头雾水，两人之前并冇任何牙齿印，唔知基利安麦巴比咁做有乜用意。