因伤缺阵超过1个月嘅保罗戴巴拿，喺世界盃前最後一场意甲复出，呢位前锋後备上阵表现活跃，不断制造进攻带领罗马补时入波，主场1比1逼和拖连奴。保罗戴巴拿有好表现，对阿根廷国家队争夺世界盃冠军系一大喜讯。

罗马今场喺55分钟失守先输0比1，全力反扑下喺69分钟换入伤愈嘅保罗戴巴拿，呢位阿根廷前锋表现突出，89分钟被对手粗野犯规被球证无视，教练摩连奴激烈投诉被逐离场。保罗戴巴拿冇受影响，91分钟博到12码，可惜比洛迪操刀宴客。去到94分钟，保罗戴巴拿禁区顶狂抽中楣，造就尼曼查马迪补射入波，罗马得以1比1逼和拖连奴。

摩连奴赛後对保罗戴巴拿赞不绝口：「有保罗戴巴拿嘅罗马系支完全唔同嘅球队，如果佢唔系受伤，罗马会拎多好多分！其他球队有好多出色球员，但罗马有咩人大家都见到，部份球员依家踢出低水平表现，依家联赛休战，所有球员都应该检讨下自己踢成点。」