阿根廷球王美斯经过16年努力，踢咗5届世界盃终於一圆冠军美梦，成为全球焦点，佢将自己捧盃相放上社交网Instagram之後，已经有超过5600万个赞好，打破IG史上及体育类别最多Like相片纪录。

美斯早前同C朗为高级品牌LV拍摄嘅「捉象棋」宣传照，已经有过千万Like，佢今次捧盃相影响力更加大，迅速达到5080万个赞好，成为IG史上最多Like体育类别相片，而且赞好数字正在不断上升，现时已经超过5,600万。

计埋其他领域相片，美斯捧盃相啱啱力压@world_record_egg一张鸡蛋相，成为IG史上最多人赞好相片，由於美斯嘅Instagram有4亿「跟随者」，呢张捧盃相嘅赞好数字有望再增加。

美斯宿敌C朗一向系「IG达人」，但今次完全被比下去，难怪网民指美斯无论球场上或者网络上都击败C朗，成为「全能球王」。