曼联凭拉舒福特头槌破网，2比0击败列斯联，亦系福仔今季各项赛事第21球，坦哈格换佢出场时同佢拥抱，赛後坦帅大赞福仔表现，仲同佢定下目标：今季入30球。

坦哈格赛後同福仔讲「个头槌好靓」，坦帅表示：「福仔每场目标就系入波，我季初就讲过，佢每场都有入波机会，必须保持专注，而且佢能够用左脚、右脚同头槌入波，只要走靓位，佢就有机会，关键系心态、专注同信念。」

拉舒福特近15场入13球，其中英超攻入8球，同时段入球数超越艾宁夏兰特，坦哈格认为佢已成为欧洲最佳前锋之一：「佢肯定系，我一早对佢有信心，佢有技术，亦有潜质，可以入更多波。」

福仔喺曼联赛季个人最佳系22球，今季尚欠1球就平纪录，不过坦帅认为可以更进一步，成为尹佩斯之後首位单季入30球嘅曼联前锋：「季初我就讲过，拉舒福特可以单季入20球，不过依家，如果就此满足，就会停止入波，作为教练，我必须继续推动佢向前。」