曼城中场奇云迪布尼喺欧联4强首回合射入世界波，协助球队逼和皇马1比1，入球固然精彩，但再次暴露出VAR形同虚设，原来曼城策动攻势过程中，皮球曾经喺边线已出界，但球证及VAR都冇反应，令到「蓝月亮」偷袭得手，以冷静见称嘅皇马教练安察洛堤都情绪失控作出投诉而食黄牌。

当时曼城後衞基尔获加前向传波，贝拿度施华飞身出脚喺边线将个波捞入场内打快攻，最後由奇云迪布尼劲射入网。卡马云加等皇马球员纷纷向球证作出投诉，指贝拿度施华捞个波入场之前，皮球已经喺空中出界。皇马主帅安察洛堤亦罕有激烈抗议，给果被球证出示黄牌警告。

由於VAR并冇介入检视，负责直播嘅电视台利用3D技术分析，证实皮球整体已经出界，应该判皇马获得界外球，曼城根本冇机会立即发动攻势入波。

不过，外媒指欧联专用足球并冇植入芯片，唔可以好似世界盃比赛判断是否出界，另外，贝拿度施华捞个波入场後，皇马一度抢回控球权，理论上，曼城嘅入球攻势已经同皮球是否出界无关，VAR唔可以介入，皇马今次只能慨叹自己唔好彩。