英超球会般尼茅夫周一(19日)解雇主帅加利奥尼尔，随即宣布聘请西班牙少帅伊拉奥拿执教。加利奥尼尔喺22/23球季带领球队护级成功，突然被炒鱿令球迷哗然，不过伊拉奥拿被视为西甲冒起最快教头，所以亦有唔少球迷表示支持。

加利奥尼尔上年8月接替柏加出任般尼茅夫看守领队，11月成功签约坐正，佢亦带领球队护级成功，表现获一致好评，般尼茅夫突然将佢炒鱿，大批网民批评做法系「疯狂」、「难以置信」，对管理层嘅决定一头雾水。

般尼茅夫随後宣布，成功聘请华历简奴教练伊拉奥拿加盟，双方签约2年。40岁嘅伊拉奥拿过去3季执教华历简奴，虽然班费系全西甲最少球队之一，但近2季分别排第12位同第11位，而且悦目嘅进攻足球亦赢到唔少赞美，唔少球迷都睇好佢可以令般尼茅夫更上层楼。