周二(20日)凌晨欧国外C组赛事，英格兰再次展示外围赛之王本色，喺奥脱福球场7比0狂数北马其顿，小组4战全胜高踞榜首。21岁新星布卡约沙卡今场连中三元，唔单止系佢职业生涯首个「帽子戏法」，亦系近15年来英格兰最年轻「戴帽」球员，进一步奠定喺国家队嘅主力位置。

英格兰今场一开波就发动猛攻，哈利卡尼29分钟接应劳基梳尔传中射入，38分钟布卡约沙卡禁区内右脚狂抽网顶拉开比数，完半场前拉舒福特射成3比0完半场。英格兰下半场未有收手，布卡约沙卡喺47同51分钟入波完成帽子戏法，尾段加云菲腊斯同哈利卡尼再有进帐，为英格兰凑成7球大捷。

效力阿仙奴嘅布卡约沙卡以21岁287日之龄，仅次於2008年嘅禾确特(19岁178日)，成为英格兰史上第2年轻「戴帽」球员，佢赛後表示：「我好开心，唔识得点形容，漫长嘅球季终於完结，呢个系最美好嘅终结方式。」布卡约沙卡早前以20万镑(约200万港元)周薪续约阿仙奴，跻身英超一线球星行列。

布卡约沙卡喺2年前欧国盃决赛射失关键12码累英格兰饮恨，不过上年世盃已锁定正选位置，领队修夫基赛後亦大赞：「沙卡喺队中好受欢迎，佢呢个星期训练嘅射门都系好准，但佢第2球窝利入波仍令人惊讶，呢场会系佢永世难忘嘅赛事。」