阿仙奴周五(7日)宣布，瑞士中场格列沙加结束7年「兵工厂生涯」，以2,500万欧元(约2.13亿港元)转会费转投利华古逊。格列沙加过去曾经喺慕逊加柏效力4年，今次重返德甲唔会陌生，而且喺利华古逊跟另一西班牙教练沙比阿朗素搵食，相信适应唔会有问题。

30岁嘅格列沙加7年前加盟阿仙奴，最初表现受到批评，2019年更曾经受唔住球迷谩骂，喺球场上公然发脾气，令佢被褫夺队长职务，当时格列沙加几乎离队，但阿迪达上任後为佢改头换面，近2季演出大获好评。随住阿仙奴重建中场，传闻迪格兰赖斯已接近加盟，阿仙奴亦接纳格列沙加重返德甲嘅意愿，据报佢同利华古逊签约5年。

有趣嘅系，利华古逊教练沙比阿朗素，同阿迪达系多年好友，拥有接近嘅足球理念，格列沙加将会成为利华古逊中场核心。利华古逊总监路菲斯喺签约仪式後表示：「我哋引入咗一个绝对顶级球员，格列沙加喺球场上嘅能力人人可见，但佢喺更衣室内嘅领袖能力，喺球坛好少人能够相比。」