曼城收购RB莱比锡中坚加华度尔一事终於搞掂，周六（5日）官方宣布，呢位21岁克罗地亚国脚正式加盟，签约5年，将会着24号波衫，虽然未有透露其他交易详情，但据报佢系以9,000万欧元(约7.7亿港元)转会费来投，非常昂贵。

加华度尔受访时兴奋地表示，自己一直梦想到英超搵食，能够加盟上季3冠王曼城及跟随名帅哥迪奥拿，亦系佢嘅荣幸。查实曼城早已计划签入加华度尔，上月中曾传出已经成事，但RB莱比锡临时叫停体测，好彩两间球会最终达成协议。有指曼城以9,000万欧元收购加华度尔，莱比锡今次赚到笑。

加华度尔2020年由萨格勒布戴拿模加盟RB莱比锡，为呢支德甲球队上阵88场入5球，佢亦系克罗地亚上年夺得世盃季军功臣，佢唔单止硬净及擅於用波，回追速度亦快，好适合哥迪奥拿嘅防守体系，令曼城防线如虎添翼。