周一(23日)凌晨西甲，一位天才新星诞生，巴塞隆拿小将马克基尔後备上阵仅23秒就入波，协助球队主场以1比0绝杀毕尔包，佢亦以17岁零291日成为巴塞踏入21世纪以来，最年轻西甲「地标战」入波球员，劲过19年前出道嘅球王美斯。身型高大嘅马克基尔属於典型9号前锋，势必成为罗拔利云度夫斯基嘅完美接班人。

巴塞隆拿今仗攻势大部份时间老鼠拉龟，无从入手，直至79分钟换入马克基尔，先至打破僵局，佢接应祖奥菲历斯直传，单刀杀入禁区窄角度射入，首次触球就入波，当时只系上阵23秒，极之高效率。

马克基尔一球成名，立即人气急升，呢位身高1米87嘅射手10年前加入巴塞青年军受训，今年6月首次晋身一队，有份参加季前备战，曾於热身赛对神户胜利船，入替罗拔利云度夫斯基。

呢位西班牙U17小国脚等到今场西甲再次入选大军名单，第1次联赛上阵就射入致胜球。马克基尔短短踢咗15分钟，除咗入波之外，仲1次拦截，2次对抗成功，顺理成章当选今场最佳球员。

赛後巴塞教练沙维对马克基尔赞不绝口：「球会当年信任17岁嘅我，所以我都信任马克基尔，佢帮我哋赢波。」马克基尔话：「真系难以置信，我惊自己瞓唔着，一直以来不断努力，就系为咗今次机会。」马克基尔属於巴塞青训产品之中，少数力量型进攻球员，速度快、步大力雄，被指有曼城前锋艾宁夏兰特嘅影子，前途无可限量。巴塞隆拿赢波之後，只系落後榜首皇马1分。