周一(6日)凌晨英超赛事，利物浦作客卢顿几乎阴沟里翻船，全靠路易斯迪亚斯强忍爸爸被绑架嘅悲痛复出，後备上阵喺补时5分钟入救命波，为「红军」逼和1比1抢番1分。路易斯迪亚斯入波後，展示写上「还我爸爸自由」嘅底衫，赛後再发声明要求左翼叛军「民族解放军」(ELN)尽快放人。

利物浦今场一如所料控制战局，达云纽尼斯早段连番攻门都冇收获，包括曾经冇运射中门楣弹出；卢顿偶尔反击亦简单而有威胁，但同样把握唔到机会。80分钟利物浦一次全军围攻不果，被卢顿快速反击撕破防线，锺达希接应伊沙卡保尼传中射入。

利物浦83分钟换入路易斯迪亚斯，亦系呢位哥伦比亚国脚爸爸上星期被绑架後首度上阵，结果去到补时5分钟，哈维艾利洛右路传中，路易斯迪亚斯「飞将军」赶到近门顶入，佢庆祝嗰阵揭开波衫，展示「还我爸爸自由」嘅字句，同时为利物浦抢番宝贵1分。

利物浦领队高普赛後表示：「好精彩、好激动、好神奇。迪亚斯对呢件事(绑架)无能为力，我哋想佢有嘢可以做。我相信冇几多人明白佢依家经历嘅事，包括我哋，足球有时可以喺黑暗日子带嚟欢乐，我哋一定会支持佢。」迪亚斯赛後亦首度发出声明，要求ELN尽快释放佢爸爸，亦要求国际组织加入协助救人。