周六(20日)德甲赛事，多蒙特作客4比0大胜科隆，早前由曼联外借回归嘅查顿辛祖愈战愈勇，今场一次精彩突破博到12码，不过就同队友富克洛上演「争射」一幕，查顿辛祖最终惨被拒绝，但无阻佢成为赢波英雄，照获球迷大赞。

查顿辛祖回归多蒙特第2场即任正选，「蜜蜂兵团」上半场由当耶尔马伦入波领先，去到58分钟，查顿辛祖左路一次精彩突破，博到科隆球员犯规，查顿辛祖随即走去要求「刽子手」富克洛让畀佢射，不过富克洛拒绝，操刀射成2比0。多蒙特之後再由当耶尔马伦同尤素法莫高高入波，凑成4比0大捷。

富克洛赛後解释「争射」12码事件：「辛祖只系简单问我可唔可以畀佢射，我就同佢讲今日我会操刀，佢都即刻同意，仲叫我一定要射入。辛祖向我施压系好事，佢想拎到重返多蒙特後第1个入波，佢会喺下个星期做到！」

唔少网民大赞查顿辛祖嘅表现：「踢得好好，继续努力」、「真正嘅查顿辛祖返嚟啦」、「坦哈格几乎摧毁咗一粒宝石」、「球员好需要喺一个开心嘅环境踢波，多蒙特畀到佢」。