曼联炒坦哈格鱿鱼後，据报即将聘请士砵亭主帅鲁宾艾摩廉执教，虽然呢位葡萄牙少帅有唔少好评，不过曼联名将史高斯就质疑，坦哈格2年前加盟嗰阵一样讲到好劲，而史高斯心目中最佳人选另有其人。

鲁宾艾摩廉喺士砵亭，赢过2次葡超冠军同2次葡联盃冠军，不过坦哈格2年前，同样挟3次荷甲冠军同2次荷盃冠军「威名」加盟，史高斯表示：「大家呢刻吹捧艾摩廉，同坦哈格当初加盟嗰阵好似，当然葡超质素高过荷甲少少，艾摩廉嘅成绩亦真系好。我哋喺英格兰睇葡萄牙足球唔多，对佢真系唔系咁熟悉。」

史高斯表示佢心目中嘅最佳领队人选，系英格兰新任主帅杜曹：「我觉得杜曹系最合适人选，佢已经证明自己可以领导顶尖球队、喺最大型嘅比赛入面获得，不过佢已经系英格兰领队。」