曼城近期经历5连败，不过比利时中场奇云迪布尼伤愈复出就成强心针，因伤抖咗超过2个月嘅佢，同曼城合约明年完结，佢就拒绝评论续约问题，话要专注回复状态，不过领队哥迪奥拿就讲，奇云迪布尼嘅去留由佢自己话事。

33岁嘅奇云迪布尼上场复出，续约问题再成热话，呢位比利时球星回应：「我真系唔知，受伤期间我将所有嘢摆埋一边，依家亦想先尽快提升状态，续约嘅事之後再讲，如果冇倾续约，今季就系我最後一季喺曼城。老实讲，其他人点讲影响唔到我，我只系想踢最好嘅足球。」

曼城领队哥迪奥拿就表示：「我唔知续约情况系点，唯一可以讲系，奇云迪布尼嘅去留由佢自己决定，就好似以前大衞施华同其他球员一样，佢想以最好嘅状态完结曼城生涯。」