曼联队长哈利马古尼日前收到炸弹恐吓电邮，警方接报去佢屋企搜查未有发现。英国《太阳报》最新披露更多细节，据报狂徒喺恐吓信入面，要求马古尼72小时内离开曼联，否则就会送3个炸弹去佢屋企，消息指马古尼已安排未婚妻同2名女儿入住安全屋。

报道指呢封恐吓电邮并唔系直接寄畀马古尼，而系送去佢嘅经理人，当时马古尼正随曼联练习，呢位中坚得悉後即刻报警，未婚妻Fern Hawkins以及2个女就转去安全屋，而警方连续2日搜索都未有结果。

消息人士透露：「信件入面话马古尼要喺72小时内离开曼联，如果唔系就炸佢屋企，中间夹杂好多人身攻击嘅字句。Fern Hawkins非常震惊，佢已经觉得唔安全，亦受够呢啲激进球迷嘅行为。」报道指马古尼喺事件後，立即添置闭路电视监察，以及聘请24小时嘅保安保护家人安全。