曼城同皇家马德里嘅欧联4强大战备受注目，不过「蓝月亮」赛前面临後防危机，祖奥简斯路停赛、基尔获加受伤、史东斯同尼敦阿基亦受伤患困扰，领队哥迪奥拿赛前暗示可能会「兵行险着」，将上场对屈福特食「大四喜」嘅加比尔捷西斯，摆去客串右闸！

面对後防危机，哥迪奥拿表示：「我哋会睇下伤兵情况，再决定系咪冒险，呢个伤兵潮如果喺11月发生就系大问题，但今季只剩7场波就唔系问题，所有球员都会因为球队嘅困难而付出更多，如果我叫加比尔捷西斯踢右闸，佢会好乐意咁去踢。」

加比尔捷西斯一向系曼城嘅「万金油」，踢唔同位置都有好表现，防守效率极高，前届欧联16强曼城淘汰皇马，两回合加比尔捷西斯都有杰出表现，将皇马出击右闸丹尼尔卡华积成功封死，《曼彻斯特晚报》指呢2场波，正正系哥迪奥拿考虑叫加比尔捷西斯客串踢闸嘅原因。