过去几季如果要选曼联最喜爱球星，桑马达必定排前列，呢位34岁西班牙中场今夏离开效力8年嘅曼联，下一站落脚点可能系曼联3大死敌之一嘅列斯联，不过魔迷不但唔反对，仲纷纷送上祝福。

西班牙《阿斯报》称，列斯联近日与桑马达接洽，询问加盟意向，同时向佢招手嘅仲有中东球会、土超加拉塔沙雷及比锡达斯，但以列斯联最有诚意，已开出实质性报价，据报双方都有合作意愿。

桑马达喺曼联效力8年，上阵285场入51球，仲系球迷眼中嘅好好先生，经常同球迷互动合照，就算落大雨都肯走入球迷堆，离队时制作告别影片，所以佢依家同曼联3大死敌曼城、利物浦、列斯联其中之一斟介，球迷都唔抗拒。

其实列斯联同曼联嘅世仇关系，主要来自列斯联方面，当年阿伦史密夫加盟曼联，至今仍未获列斯联球迷原谅，反过来曼联球员转投列斯联，魔迷并唔反对，并向桑马达送上祝福。