阿仙奴势如破竹，喺周四(1日)凌晨英超凭2位巴西前锋加比尔捷西斯、加比尔马天尼利各入1球，主场以2比1击阿士东维拉，今季英超5战全胜，继续排榜首，为周日(4日)晚作客曼联，壮大声势。

21岁新星加比尔马天尼利今场表现非常活跃，频频喺左路发动攻势，包括1次极具威胁传中，但布卡约沙卡远柱接应，面对空门竟然射高。

幸好兵工厂攻势陆续有来，踢到30分钟，格列沙加左路窄角度起脚，虽然被维拉门将达米安马天尼斯挡出，但仲有加比尔捷西斯补射入网。

换边之後，出现一个罕见入球，阿士东维拉中场杜格拉斯雷斯後备上阵仅1分钟，佢开出角球直接弯入网。阿仙奴大意失波之後，好快由加比尔马天尼利射入奠定赢2比1胜局。

阿仙奴2位加比尔一齐入波，官方将今场最佳球员奖颁畀「耶稣仔」加比尔捷西斯，佢今场4次射门有3次中目标，1次过人，3次争顶成功。

加比尔捷西斯今夏由曼城转投阿仙奴後，踢5场英超入3球及3次助攻，合共创造6球，成为兵工厂史上首5场英超披甲创造最多入波嘅球员。