周四(1日)凌晨英超，上季冠军曼城再次展现强大攻力，主场以6比0大胜诺定咸森林，当红射手艾宁夏兰特继上仗入3球後，今仗又再上演「帽子戏法」。呢位22岁挪威国脚今季联赛已经有9球进帐，成为英超史上首5场上阵最多入波嘅球员。

曼城上仗上半场落後水晶宫2球，下半场靠艾宁夏兰特发威入3球反胜4比2，呢位被网民起花名「布欧」嘅入球机器，今场踢咗38分钟已完成「帽子戏法」。

换边之後，祖奥简斯路射入世界波，加上今季新加盟射手祖利安艾华利斯梅开二度，送够半打光蛋畀诺定咸森林。

主角艾宁夏兰特今场威到尽，唔止协助曼城大胜，更超越麦奇昆尼及「蓝月亮」名宿阿古路，成为史上首位踢头5场英超入到9球嘅球员，仲多过劲旅车路士今季全队入波。

其实曼城今场已经留有一手，「助攻王」奇云迪布尼担任後备，等到69分钟先至入替艾宁夏兰特，2人冇得并肩作战，否则夏兰特随时唔止入3球。

难怪网民睇好夏兰特只需要踢半季，就可以追平上季英超神射手得主穆罕默德沙拿及孙兴民入23球嘅数字。