意甲第7轮赛事出现罕见场面，AC米兰、国际米兰、祖云达斯同罗马4大劲旅「约埋」一齐输波！据Opta数据显示，呢4大劲旅对上一次喺同一日联赛输波，已经系1955年2月嘅事，当年最後冠军落喺费伦天拿手上。

意甲今次豪门沦陷，先系国际米兰作客1比3输畀乌甸尼斯，之後祖云达斯喺迪马利亚开肘打人食红牌下，作客0比1输畀蒙沙；紧接系罗马主场0比1不敌阿特兰大，呢场罗马有个争议性12码球证冇判，教练摩连奴投诉仲被球证赶埋出场。

至於衞冕嘅AC米兰就喺主场1比2输畀拿玻里，依家拿玻里同阿特兰大以7战17分并列榜首。

情况最恶劣嘅非祖云达斯莫属，佢哋近5场比赛2和3负，喺欧联同意甲全面崩溃，迪马利亚赛後就为自己鲁莽食红牌道歉，直指输波系佢嘅责任。据报祖云达斯教练阿里基帅位不稳，《都灵体育报》指球员对佢已失去信任，今次国际赛期祖云达斯可能会「做嘢」。