世盃冠军阿根廷大军由卡塔尔返国後，周二(20日)举行巴士胜利巡游，据报多达400万球迷沿途欢迎，再次塞爆布宜诺斯艾利斯。不过巡游期间发生连串恐怖意外，美斯同几名队友坐喺巴士车顶享受群众欢呼嗰阵，几乎被一条电缆打爆头！巡游期间亦有多名球迷企图喺桥上跳上巴士失手堕地，阿根廷足总最终要将庆典腰斩，搵直升机救走一众冠军球员。

美斯等球员返阿根廷後通宵庆祝，阿根廷足总就安排大军登上开蓬巴士，由阿根廷训练基地驶去布宜诺斯艾利斯地标方尖碑，路程大约80公里，报道指参与庆典人数多达400万人。但系由於人数实在太多，巡游过程中出现大量惊险场面，阿根廷足总因安全理由决定提前结束。

影片所见，美斯、迪马利亚、奥达文迪、迪保罗同柏利迪斯坐喺巴士上层後排顶盖，点知大家完全冇为意巴士驶经一条架空电缆，5名球员等到电缆出现喺面前先察觉，最後1秒及时「缩头」仅仅被开，柏利迪斯甚至连顶Cap帽都被电缆「批」甩，缩迟一步後果不堪设想。

除咗球员有恐怖经历外，巴士沿途驶过多条天桥嗰阵，有唔止1个狂迷试图喺跳上面跳落巴士接触球员，但系都失手由桥上面堕地，现场消息指有人要由担架抬走，亦有人堕桥後神奇自行离开。为安全起见，阿根廷足总宣布腰斩巡游，并安排军用直升机接走美斯等球员，喺天空完成埋呢次巡游庆典。