法国失落世界盃冠军之後，再受打击，因伤缺席今届赛事嘅射手宾施马宣布结束国家队生涯，唔会再为呢支欧洲劲旅披甲，据悉系由於呢位35岁金球奖得主同法国领队迪甘斯关系破裂，加上考虑到自己年纪唔细，希望集中力量为所属球会皇马比赛。

宾施马透过社交网公布决定：「我犯过错，亦付出过，先至走到今日，我为此感到自豪，写下自己嘅故事，而我哋嘅故事已经结束。」值得一提，宾施马宣布永久退出国家队嘅日子，正系佢35岁生日，似乎有希望重生嘅意思。

宾施马2006年11月首次入选法国国家队，总共上阵97场入37球，其中2015年因为涉嫌勒索前国家队队友华布拿，遭警方调查，并被主帅迪甘斯弃用长达6年，直至上年先至获重召出战欧国盃。

宾施马原本都有入选法国26人名单参加今届世界盃，但开赛前夕因伤离队治疗，一度传出可能喺决赛复出，但最终并冇出现，甚至拒绝法国总统马克龙邀请，唔肯去现场睇决赛。

据悉宾施马伤势并唔严重，但迪甘斯仍然要求佢离队治疗，令呢位射手非常不满，两人关系因而破裂。由於迪甘斯好大机会留任，宾施马乾脆自己行先一步，结束国家队生涯。