美斯终於登基，协助阿根廷勇夺世盃冠军，佢同C朗长达十几年嘅球王决斗，胜负已分，两位「35+」老将逐渐淡出。腾空出嚟嘅新「世一」位置，暂时以基利安麦巴比最有资格坐上。不过一只手掌拍唔响，球迷当然乐见有挑战者出现，同佢展开新世代球王之争。以目前情况观察，艾宁夏兰特、祖利安艾华利斯、云尼斯奥斯祖利亚及加普，都有潜力做「麦总」对手。

夏兰特入球数字胜在屈机

由比利、马纳当拿到美斯同C朗，「球王」基本上已经同前锋、入球数字挂勾。基利安麦巴比出道以嚟都以「屈机」嘅入球数字见称，喺世盃创造嘅入球纪录更系难以置信，而当今唯一一个喺入球数字上可以同佢匹敌嘅新世代前锋，就只有挪威「魔人」艾宁夏兰特。

效力曼城嘅艾宁夏兰特依家只有22岁，比基利安麦巴比仲要年轻两岁，呢位挪威前锋嘅入球数字可以用「变态」嚟形容。基利安麦巴比喺法甲呼风唤雨，艾宁夏兰特就喺德甲同英超横行霸道，两人唯一正面交锋嘅舞台就系欧联。基利安麦巴比历来59场欧联入40球，平均每场入0.68球，不过艾宁夏兰特更加犀利，23场欧联赛事攻入28球，平均每场入1.22球，入球能力有过之而无不及！

生於挪威「输在起跑线」

当然，两人嘅「球王之争」最大分野就系国家背景，基利安麦巴比有法国庞大星级阵容支持，容易喺国际赛拎到好成绩，相反挪威作为北欧足球小国，对上一次出席世盃决赛周已经系1998年嘅事，艾宁夏兰特喺国际舞台上可谓输在起跑线上，但如果佢能够带领挪威跻身决赛周，呢个难度将令佢嘅成就更加可贵。

云尼斯奥斯有皇马效应加持

论新一代顶级球员，当然唔少得「森巴兵」，当中以云尼斯奥斯祖利亚最抢镜。呢位翼锋出道时已有「新尼马」之称，未满18岁就被皇马重金收购，虽然「小云」早几年表现平庸，但经磨练後，近两季大爆发，成为「银河舰队」进攻泉源，加上有「皇马效应」加持，将来争夺金球奖等殊荣都易啲。

踢「银河舰队」有利攞奖

22岁嘅云尼斯奥斯祖利亚上季为皇马上阵52场入22球，成为球队夺得西甲及欧联冠军嘅功臣，贡献不亚於宾施马。「小云」今季踢21场已有10球进帐，有望再创单季入波新高，仲有大把潜力空间，佢除咗射术了得，亦有超卓个人突破能力，可以为队友铺桥搭路，踢法侵略性可媲美基利安麦巴比。

同埋云尼斯奥斯祖利亚效力皇马及巴西，两支分别系世上最强球会及国家队，有一班出色队友帮助，夺取各大锦标嘅机会都较大，若以奖盃论成就嘅话，「小云」肯定有着数。

准备登陆顶级联赛加普誓显身价

荷兰一向人才辈出，由告鲁夫、云巴士顿、古列治、柏金、云尼斯达莱，位位都系独当一面球星，讲到依家要争「世一」，则以燕豪芬前锋加普最有潜力。

23岁嘅加普身高1米93，但佢高大得嚟一啲都唔笨重，反而以灵巧及技术细腻见称。加普喺进攻线上相当全面，可以司职中锋、翼锋或进攻中场，并擅长处理罚球同角球，因此入波及助攻都非常多，上季就为燕豪芬上阵47场射入21球，今季荷甲延续火热状态，上阵14场射入9球及交出12次助攻，数据绝对系「球王级」。

红魔阿仙奴吼到实

可能会有人话荷甲水平唔高，佢嘅数据有水份，但加普今届世盃连续3场分组赛入波，已经证明自己真材实料。加上曼联及阿仙奴等豪门都有意签入加普，睇嚟佢好快有机会登陆顶级联赛一显身价。

获哥帅悉心栽培艾华利斯接美斯棒

随住美斯年事已高，阿根廷亦急需搵接班人，祖利安艾华利斯可谓当仁不让。呢位22岁曼城前锋，今届世盃原本只系後备一员，因为担正嘅拿达路马天尼斯突然走晒样，佢亦趁势上位，唔单止成为偶像美斯嘅最佳拍档，以出色走位制造机会，并且攻入4粒，系自2010年希古恩之後，阿根廷史上第2位单届世盃入4球嘅22岁或以下球员，依家仲捧盃而回，一鸣惊人。

花名「蜘蛛」够晒灵活

艾华利斯花名系「蜘蛛」，佢老窦话因为佢好似蜘蛛一样，细细只但速度快劲敏捷。呢位「蜘蛛」能胜任中锋、影子前锋或翼锋，射术精湛兼阅读球赛能力强。喺世盃前曼城球员於更衣室讨论边队会捧盃，好多人都估系欧洲球队，但主帅哥迪奥拿一言不发，立即指向代表阿根廷嘅艾华利斯，果然独具慧眼。

其实美斯当年喺巴塞隆拿正正得到哥帅指导，从一位超新星逐渐走上球王之路，有呢位名帅悉心栽培，艾华利斯变成「下一个美斯」绝对有可能。