沙特阿拉伯豪门希拉尔开出3亿美元年薪邀请美斯加盟一事有新进展，巴黎圣日耳门主席艾卡理化嘅堂兄弟阿提亚近日向传媒爆料，美斯将於3至6个月後转战沙特。

阿提亚喺一个体育专栏爆料，佢话：「以我现时所知情况，从艾卡理化方面了解，艾纳斯开出天价年薪(2亿欧元)签入C朗，我相信几个月之後，大约3或6个月，沙特另一豪门就会签入美斯，我甚至可以讲出系边队，就系希拉尔。」

对於美斯会否重返巴塞隆拿，佢话：「信我，美斯唔会返巴塞，到时候，佢会以基督徒身份去沙特，嗰度好有钱，球员都想喺嗰度挖金。」佢仲话，其实去年初，美斯签约成为沙特旅游大使嗰阵，已经同当地球会有接触，并已经签约。

由於阿提亚身份系艾卡理化堂兄弟，佢对美斯合约内容同续约情况肯定有所了解，如果佢讲嘅系真，C朗同美斯的确有可能喺沙特各效力一支球队，喺联赛再碰头。