曼联瑞典新星艾兰加近期长坐冷板，有可能获批准离队，除咗爱华顿同般尼等英超球队有意洽购外，多蒙特亦将提出收购，蜜蜂兵团近年专门低价搜罗年轻新星，踢几年後天价转手出售，佢哋睇中艾兰加潜力，打算出手。

20岁嘅艾兰加在兰历克年代颇受重用，经常有上阵机会，但坦哈格入主後就冇运行，今季仅上阵18场0入球，多数做後备，最近一场英足盃对查尔顿获正选机会，但被批评表现唔达标，嚟紧查顿辛祖康复後，佢嘅出场顺序再後退，更加冇运行。

英国传媒报道，曼联有可能1月转会窗批准艾兰加离队，爱华顿同般尼有意接收，其中护级水深火热嘅爱华顿开价3500万镑，而艾兰加市价只值2500万欧元，诚意满满。

不过多蒙特出手就唔同讲法，呢支德甲球队对艾兰加有致命吸引力，事关近年踢过多蒙特嘅年轻球员，都会成为天价巨星，例如查顿辛祖、艾宁夏兰特，嚟紧仲有祖迪比宁咸同尤素法莫高高，证明佢哋培养小将系有一手，艾兰加为咗自己未来着想，转投多蒙特系唔错嘅选择。