利物浦啱啱喺英联盃决赛击败车路士，夺得今季首项锦标，球员同球迷都相当兴奋。当中自小系「红军」球迷嘅18岁小将哈维艾利洛，就因为喺赛後执起由球迷掉入场内嘅烟雾弹，而引起英足总关注，可能会因此而受罚。

哈维艾利洛喺英联盃决赛79分钟入替队长佐敦轩达臣，成为利物浦历来最年轻喺决赛上阵嘅球员，佢亦都不负所托，喺互射12码阶段射入，协助「红军」击败车路士夺冠。年轻人做事通常冲动啲，艾利洛当然唔例外，呢位自小系利物浦拥趸嘅小球员，喺赛後嗰阵被影到手持由球迷掉入场内嘅红色烟雾弹庆祝，而呢个行为已惹起英格兰足总关注。

据传媒报道，英足总已致函艾利洛问起呢件事，有可能会向佢作出处罚，而利物浦会方暂时未有就事件作出回应。