阿布拉莫域可以话系英超「金元足球」始祖，2003年入主车路士之後，策划多单震撼球坛嘅转会收购，包括2006年以打破当时英超球会签人最高转会费纪录嘅3,100万镑，向AC米兰收购射手舒夫真高，可惜呢位乌克兰名将上「车」後，表现远差预期，效力2季就离队。时至今日，阿布亦因为俄罗斯入侵乌克兰，而被逼出售车路士，似乎一切冥冥之中有注定。

阿布拉莫域经营球会的确非常成功，一手将濒临破产嘅车路士，打造成英超王者，以至欧洲及世界冠军，但睇番呢位富豪收购球员嘅眼光其实麻麻，除咗舒夫真高之外，仲有唔少重金收购，结果强差人意。

阿布时代，车路士最贵收购正系上年夏天以1.15亿欧元买番卢卡古，但呢位比利时国脚表现唔及效力国际米兰时期，近期更传出同领队杜曹闹不和，甚至面对被弃用。

第2贵「车手」系2020年9月由利华古逊加盟嘅夏维斯，转会费高达8,000万欧元，佢上「车」首季表现令人失望，幸好德国同胞杜曹接手领军，先至逐渐踢番出水准。

同样转会费达8,000万欧元嘅门将阿列沙巴拿加，亦系一大失败收购，呢位史上最高身价门将，依家只能担任後备。

艾华路莫拉达、费兰度托利斯等贵价兵都系「倒钱落海」，仲未计阿布历年经常换帅，包括炒咗摩连奴等着名领队，作出巨额赔偿。

不过，车仔亦夺得5次英超冠军、5次英足盃、3次英联盃、2次欧联冠军、2次欧霸盃及1次世冠盃，为阿布带来金钱买唔到嘅满足感，难怪佢决定离开，都唔要求车仔偿还15亿镑贷款，因为车仔喺佢目心中嘅位置已经远超金钱。

阿布时代车路士10大最贵收购

1.卢卡古(1.15亿欧元)

2.夏维斯(8,000万欧元)

2.阿列沙巴拿加(8,000万欧元)

4.艾华路莫拉达(6,600万欧元)

5.基斯甸普列锡(6,400万欧元)

6.费兰度托利斯(5,850万欧元)

7.佐真奴(5,700万欧元)

8.迪姆华拿(5,300万欧元)

9.芝维尔(5,020万欧元)

10.高华锡(4,500万欧元)