西甲劲旅巴塞隆拿周四(14日)凌晨进行首场热身赛，不过对住西班牙第5级联赛球队奥洛(Olot)，竟然被对手逼和1比1，不过教练沙维就话赛果唔重要，佢睇到球队有积极嘅讯号。

巴塞隆拿今场强阵出击，正选有奥巴美扬挂帅同达史特根把关，两位中场新兵基斯尔同柏保路托利亦首演担正，28分钟达史特根大脚开斩前，直接助攻畀奥巴美扬挑射入网，但完半场前奥洛博到12码，成功追成1比1平手。

下半场巴塞再换入安素法迪、柏迪同比真历等球星，可惜对住实力低几班嘅奥洛都入唔到波，最终握手言和。教练沙维赛後表示：「今场只系第1场波，球员喺节奏、体力都有啲问题，亦未能把握入波机会，但系我都见到好多好好嘅地方，我哋要将球队理念贯输畀新人，今场战果并唔重要。」