当今球坛可以容纳C朗嘅大球会寥寥无几，近期传出经理人佐治文迪斯希望促成佢转投马德里体育会，但呢支西甲劲旅嘅会长施里苏终於开腔，表明冇可能签入C朗，令佢又少一条出路。

施里苏接受西班牙传媒访问时话：「我唔知点解会出现C朗加盟马体会嘅传闻，一定唔系事实，现实上佢冇可能来马体会，我哋亦冇能力负担佢嘅薪酬。」

C朗效力曼联嘅周薪高达50万镑，虽然经理人佐治文迪斯曾经放风表示，C朗愿意减薪30%，但人工仍然相当高。

不过，马体会拒绝签C朗嘅最大原因，应该系佢曾效力同市宿敌皇马9年，多次射入马体会大门，并2次喺欧联决赛协助皇马击败马体会，成为对方球迷嘅眼中钉，马体会球迷冇可能接受C朗。

早前更有大批马体会球迷喺网上发起「反C朗运动」，有人甚至威胁如果球队真系签C朗，就会放弃会员资格作为抗议，群情汹涌。施里苏今次出声，排除签入C朗嘅可能性，都系顺应民意同平息民愤。