C朗喺欧霸盃正选上阵但表现欠奉，重夺曼联正选机会渺茫，英国传媒报道，呢位葡萄牙巨星正认真考虑今夏来自沙特阿拉伯神秘球会嘅2.11亿镑天价斟介，1月离开曼联去中东掘金养老。

英国《镜报》报道，卡塔尔世盃过後，C朗比赛生涯进入最後阶段，37岁嘅佢无法接受在曼联长居後备，今夏又受到欧洲各豪门婉拒嘅尴尬情况之後，只能无奈面对现实，认真考虑自己未来。

报道指，今夏转会窗虽然传过唔少消息，但真正向C朗提出报价嘅球会只有一间，就系来自沙特阿拉伯嘅神秘球会，有报道指该队就系沙特豪门、去年亚冠盃盟主希拉尔，球会另一名称为利雅德新明。

希拉尔向C朗开出一分为期两年、总值2.11亿镑嘅天价合约，折合周薪200万镑，绝对配得上C朗嘅身价，近日沙特足协主席表示，虽然C朗今夏拒绝咗，但呢分报价目前仍然有效，只要C朗答应，随时可以去中东掘金。