周一(19日)凌晨法甲赛事，巴黎圣日耳门(PSG)凭美斯一箭定江山，作客1比0击败里昂，继续坐喺联赛「一哥」位置。美斯今场入波，令佢足球生涯「非12码」入球数字超越C朗拿度，喺呢场「球王竞赛」入面赢番一仗。

美斯继周中欧联入波後，今场脚风依然好顺，开波4分钟佢喺中场策动攻势，交畀左边嘅尼马後，自己杀入禁区接应回传第1时间抽入，虽然PSG之後再冇进帐，但呢一球亦足够帮助球队全取3分，并趁马赛和波失分，喺榜首建立2分领先优势。

美斯今季各项赛事已有6个入波同8次助攻，状态极佳，今场嘅入波亦系佢职业生涯第775球，扣除103个12码後有672球，超越C朗拿度嘅671个「非12码」入波(C朗有145个12码入球)。C朗依家喺曼联已沦为後备，美斯有望继续将呢个入球差距拉大。