阿根廷周三(28日)朝早喺美国纽约踢热身赛，轻轻松3比0大胜牙买加，今场主角仍然系「球王」美斯，佢後备上阵踢半个钟多啲就梅开二度，而且仲现场帮硬闯球场嘅粉丝喺背脊签名，场面相当搞笑。

赛前传出患上流感嘅美斯，今仗先担任後备，不过两队实力差距明显，阿根廷13分钟就由祖利安艾华利斯先开纪录。美斯喺56分钟上阵，短短34分钟时间就有5次射门，4次命中目标兼射入2球，近3场国家队赛事入9球，以巅峰状态迎接世界盃来临。

今场赛事多次出现球迷硬闯球场画面，目标人物当然就系美斯，当呢位阿根廷巨星射入3比0入球後，一名上身赤裸球迷成功冲到美斯身边，要佢喺自己背脊上面签名，美斯亦接过枝笔准备「郁手」，可惜多名保安赶到将个球迷压喺地上，就连美斯都被撞开，最终索取签名计划失败。