曼联换帅行动即将完成，葡萄牙教练鲁宾艾摩廉周五(1日)证实，转教曼联嘅「肥皂剧」就快结束。英国传媒透露，曼联同士砵亭已达成协议，不过39岁嘅艾摩廉要等11月国际赛期先至上任，月底作客叶士域治会系艾摩廉首演，而佢嘅薪酬亦曝光，人工少过坦哈格。

士砵亭周六(2日)凌晨要对艾马多拉，艾摩廉喺赛前记招被追问过档曼联情况，强烈暗示入「魔」只系时间问题：「情况对所有人都好困难，我谂比赛之後会解决，会长扞衞球会嘅利益，我系唔会参与。比赛後好多嘢都会更清晰，呢出肥皂剧就快结束，我唔可以讲得太清楚。」

据报曼联同士砵亭已达成协议，不过艾摩廉要等月中国际赛期先正式上任。英国《每日邮报》亦爆出艾摩廉合约细节，2年半合约年薪为650万镑，比坦哈格夏天续约後嘅675万镑更少，但呢个人工已经系艾摩廉喺士砵亭嘅3倍。按计划艾摩廉仲会教多士砵亭3场，包括下周中欧联主场迎战曼城。

延伸阅读：【鲁宾艾摩廉11月中接手曼联　云佬带多3场】

https://hk.on.cc/hk/bkn/cnt/sport/20241031/bkn-20241031220027268-1031_00882_001.html