查顿辛祖今季被曼联外借去车路士之後，获得主帅马利斯卡器重，演出亦有明显改善，但近2场都冇上阵，令人怀疑又被打入冷宫。不过，马利斯卡解释话，收起呢位24岁英格兰翼锋，只系战术部署，并非因为佢表现差。

查顿辛祖最近1次披甲系英超1比2不敌利物浦，车路士近2场分别欧协联对彭拿典奈高斯、英超对纽卡素，佢都冇份上阵，难免令人怀疑佢故态复萌。

马利斯卡被传媒问到辛祖情况时话：「辛祖近2场冇披甲，只属战术需要，并冇其他问题，佢加盟以来，表现非常好，但任何球员都冇可能全季保持最佳状态，辛祖仲有好多比赛需要踢，佢要勤力争取表现。」

查顿辛祖近2场缺阵，车路士都赢波，代替佢正选位置嘅柏度尼图连续2场有助攻，辛祖要抢番正选，并非易事。