周二(26日)凌晨亚冠精英盃B组，艾纳斯作客3比1击败艾加拉法。葡萄牙老将C朗拿度再显功架，今场梅开二度後又改写3大纪录，包括成为首个30岁後入450球球员、首个喺冠军联赛入150球球员，以及首个喺13个年度单年入40球球员，令人敬佩！

已经39岁嘅C朗未有停滞，艾纳斯今仗作客半场被闷和，但换边後唔够1分钟，C朗就接应传中头槌打破僵局；安祖路加比尔拉开到2比0後，C朗64分钟嘅入球更加精彩，佢喺禁区内接波後潇洒呃过对手，摆大位轻松熨入。祖斯奴尾段为主队破蛋，无阻艾纳斯赢波。

C朗第1个入球片段：https://twitter.com/i/status/1861113452233637960　

C朗第2个入球片段：https://twitter.com/i/status/1861101117880381510　

C朗依家向生涯1,000球目标进发，目前数字增加到913球，而且仲不断改写纪录。喺C朗913个入球当中，有450球系佢30岁生日之後所入，系足球史上第1人；喺欧洲(欧联)、亚洲(亚冠盃)两大顶级赛事合共入150球，同样前无古人；另外，C朗喺2024年入球达40大关，佢同美斯原本共同保持12年入40+入球纪录，依家C朗就第13年达成呢个里程碑，独占纪录。