英超劲旅曼联喺转会市场终於发力，据报未来1星期内将签入3大球星，丹麦中场基斯甸艾历臣、阿根廷中坚利辛度马天尼斯，将会半途加入喺澳洲集训嘅曼联大军，而「红魔鬼」亦就收购荷兰中场法兰基迪庄同巴塞隆拿达成协议，报道指巴塞为逼使呢位中场答应转会，将会掟法兰基迪庄入雪柜，周六(16日)展开嘅美国之行亦唔会带佢出征。

曼联今夏只签入荷兰左闸杜维尔马拉西亚，进度缓慢令球迷不满，但「红魔鬼」近日突然发力，据报基斯甸艾历臣已通过体测，将会签约3年，并且会即刻飞去澳洲同球队会合。差唔多时间归队嘅仲有利辛度马天尼斯，曼联开价5,000万欧元收购已获阿积士接纳，呢位阿根廷国脚嘅私人厨师周五(15日)更率先「泄密」，喺IG贴出为利辛度马天尼斯炮制嘅「告别晚餐」，并留言：「我已经尽力叫佢留多1年，但佢都系会去曼联，曼联球迷请好好照顾佢，呢个人冇得顶！」

至於纠缠多时嘅法兰基迪庄转会，未来48小时会有突破性发展，权威记者Fabrizio Romano证实曼联同巴塞隆拿就8,500万欧元转会费达成协议，问题系法兰基迪庄坚决唔走，因为巴塞喺早前疫情期间，拖欠佢约2,000万欧元人工未找数，而巴塞如果卖唔出法兰基迪庄套现，就唔可以为基斯尔、安达斯基斯坦臣同拉芬夏比洛尼等新兵注册，所以出尽法宝要逼该荷兰中场离队。

西班牙多间媒体报道，巴塞将会出绝招，通知法兰基迪庄如果唔答应转会，将会被掟入雪柜，球队周六就会飞去美国进行季前集训，法兰基迪庄只会同其他被挂牌球员一齐留喺西班牙。由於世界盃决赛周年底举行，如果法兰基迪庄喺巴塞长坐冷板，随时会失去荷兰国家队席位，可能会被逼就范，同意转会曼联再为坦哈格效力。