巴塞隆拿官方周四(14日)宣布，与今夏约满嘅法国前锋奥士文尼迪比利续约2年，至2024年6月届满，许以球队关键角色地位，而且仲有人工加，据报净收入比旧合约有轻微增幅。

迪比利系巴塞近年失败收购之一，2017年以1.45亿欧元由多蒙特收购呢位法国新星，原希望佢接替尼马嘅位置，可惜呢位天才前锋纪律甚差，又经常受伤，在巴塞5年上阵150场攻入32球，表现同身价不成比例。

近年巴塞一直希望将佢出售，但乏人问津，卒之等到约满，回复自由身嘅迪比利虽然只有25岁，但搵唔到买家接手，最终接受巴塞续约方案，继续留队。

消息指，迪比利嘅人工有所增加，佢旧合约年薪系税前1200万欧元，另加奖金，净收入600万欧元加奖金，而新约系净年薪1100万欧元，冇奖金，计落有轻微增幅，另外新约亦包含解约条款，方便佢一搵到买家，就可以离队。