C朗拿度同曼联嘅转会拉锯战白热化，权威媒体《The Athletic》报道，C朗经理人佐治文迪斯同士砵亭正进行斟介，呢位葡萄牙国脚有机会重返出道母会；《太阳报》更指C朗向曼联表示，佢已经收到其他球会聘约，要求曼联尽快定价促成转会。

周一(25日)已返曼彻斯特报到嘅C朗，同领队坦哈格会面後坚持离队意愿，目前只系单独练习，《The Athletic》记者威韦尔报道：「佐治文迪斯同士砵亭正进行斟介，教练鲁宾艾摩廉对C朗加盟嘅适应有怀疑，要负担C朗巨额薪酬亦较复杂，但签C朗会带来无限商机，喺全球制造巨大商业收益。」

报道指C朗希望转投可以踢欧联嘅球会，而士砵亭将会以葡超亚军身份出战，事实上近期亦有唔少迹象指C朗有机会回归母会，包括葡萄牙媒体影到C朗揸车进入士砵亭总部，以及有记者指C朗女友乔治娜，已为4个仔女办理入读里斯本嘅学校。

虽然车路士、拜仁慕尼黑等劲旅先後拒绝收购，不过英国《太阳报》指出，C朗向曼联表示已经收到其他球员聘约，问题系曼联将C朗列为「非卖品」，至今仍未为佢嘅转会定出价格，令有兴趣买家无从入手，C朗要求提前解约被拒後，已要求曼联尽快定出合理转会费。

《太阳报》未有指出C朗「已经收到」嘅聘约系嚟自边度，除依家正斟介嘅士砵亭之外，传闻西甲马德里体育会同意甲拿玻里，仍然对收购C朗保持兴趣，而沙特阿拉伯球会嘅合约财政条件最好，但C朗未有计划去中东落班。