C朗今夏踢边队仲未知，留喺曼联机会不大，母会士砵亭系佢最後水泡，现时有得畀佢拣嘅只有拿玻里或马德里体育会，当中又以拿玻里机会最高，不过有个条件唔知佢能否接受，就系大幅减薪7成。

西班牙《阿斯报》报道，拿玻里上季意甲排第3，有欧联资格，系联赛有力竞争者，亦有实力晋级欧联淘汰赛，意甲环境对C朗并唔陌生，加上经理人佐治文迪斯同拿玻里主席迪劳伦迪斯私底下系老友，要促成交易并唔困难。

拿玻里80年代曾经拥有马纳当拿，成为球会象徵性人物，佢哋今夏流失咗梅顿斯、恩斯治尼等球星，有需要补入王牌前锋，C朗已经被PSG、拜仁、车路士等豪门相继拒绝，依家只能考虑较为二线嘅拿玻里及马体会，如果畀拿玻里冷手执个热煎堆签入C朗，咁就完美。

C朗去拿玻里，最大问题系人工，佢喺曼联周薪高达50万镑，以拿玻里财政能力推算，C朗必须大幅减薪7成，周薪大减至15万镑才有可能，C朗是否接受咁嘅安排，先系关键。